Қызылорда облысында жеке меншік балабақшалардың балаларды тасымалдауына қатысты талаптар күшейтілді. Жергілікті билік өкілдері бұл шешім кәсіпкерлердің жұмысына қысым жасау емес, ең алдымен балалардың амандығы үшін жасалып отырғанын айтады.
«Мақсат – кәсіпті тоқтату емес, бала қауіпсіздігін сақтау»
Облыс әкімінің орынбасары Мейрамбек Шермағанбетовтың сөзінше, соңғы уақытта ата-аналар тарапынан шағымдар көбейген. Балабақшаларда балалардың улануы, соққыға жығылуы, тіпті жол апатына тап болуы секілді оқиғалар тіркелуде.
– Әрине, елде бизнестің дамып, өркендеуі қуантады. Бірақ оның бәрі заңға және талаптарға сай болуы тиіс. Жаңа ғана айтылғандай, кейбір балабақшаларда олқылықтар жетерлік. Бүгінде 93 мекемеге түрлі бағытта ескерту берілді. Егер олар белгіленген уақыт ішінде кемшіліктерін жоймаса, мемлекеттік тапсырыс тоқтатылады, – деді ол.
Шермағанбетов өңірде 39 жеке мектептің барын, онда 136 зейнеткер ұстаз еңбек етіп жүргенін де атап өтті. Оның пікірінше, тәжірибелі мамандардың еңбегіне сұраныс бар, дегенмен білім сапасын арттыру үшін жаңа білікті кадрларды тарту қажет.
Балабақшалар заңсыз тасымалмен айналысқан
Облыстық білім басқармасының басшысы Асқарбек Есжановтың айтуынша, қолданыстағы ережеге сәйкес, балаларды тасымалдау тек 7 жастан бастап рұқсат етіледі. Бұл жасқа жеткендер – мектеп оқушылары. Сондықтан балабақшалардың мұндай қызмет көрсетуге ешқандай құқығы жоқ.
– Өкінішке қарай, кейбір кәсіп иелері баланың жағдайын емес, өз пайдасын көбірек ойлап келеді. Қазіргі күнге дейін аймақтағы 374 жекеменшік балабақшаның 106-сы балаларды заңсыз тасып келген. Соның салдарынан екі мәрте жол апаты орын алды. Оның екеуінде де көліктегі бала саны орындық санынан артық болған, – деді басқарма басшысы.
