Аудан әкімі Әйтеке би кентіндегі құрылыс нысандарын аралап, жұмыс сапасын бақылауға алды

Бүгін аудан әкімі Алмасбек Есмаханов Әйтеке би кентіндегі бірқатар әлеуметтік және инфрақұрылымдық нысандарды аралап, атқарылып жатқан жұмыстардың барысымен танысты. Іссапар барысында кент аумағында салынып жатқан ойын және спорт алаңдары, жол жөндеу нысандары мен тұрғын үй секторындағы абаттандыру жұмыстары назарға алынды.
Алдымен аудан басшысы Р.Сабырбаев көшесінде жүргізіліп жатқан ағымдағы жол жөндеу жұмыстарының сапасын тексерді. Мердігер мекеме өкілдерімен кездескен ол жол құрылысының талапқа сай орындалуына ерекше мән беру қажеттігін атап өтті. Сондай-ақ салаға жауапты орынбасарына барлық жұмыстарды тұрақты бақылауда ұстауды тапсырды.
Биыл аудан орталығында жол инфрақұрылымын жаңғырту жұмыстары жалғасады. Атап айтқанда, С.Сейфуллин, Біржан сал, Жалаңтөс батыр, Ж.Аймауытов, М.Шоқай және С.Сүлейменов көшелеріне ағымдағы жөндеу жұмыстарын жүргізу жоспарланған. Бұл бастамалар тұрғындардың қатынасын жеңілдетіп, көлік қозғалысының қауіпсіздігін арттыруға бағытталған.
Бұдан кейін аудан әкімі кенттегі спорт нысандарының жай-күйімен танысты. Бұған дейін берілген тапсырмаларға сәйкес, қазіргі таңда Әйтеке би кентінде екі жаңа спорт алаңының құрылысы басталып, тағы екі алаңға жөндеу жұмыстары жүргізілуде.
Аудан басшысы жаңадан бой көтеріп жатқан тұрғын үй аймағындағы А.Әсербаев пен Ж.Құдабаев көшелерінің қиылысында салынып жатқан жаңа спорт алаңын аралады. Сонымен қатар Михайлюк көшесі бойында жөнделіп жатқан спорт алаңының жұмысымен танысып, мердігерлерге нысандарды сапалы әрі белгіленген мерзімде аяқтауды тапсырды.
Әкім жаңа ойын алаңдарын 1 маусымға дейін толық аяқтап, ел игілігіне беруді міндеттеді. Сонымен бірге кент әкіміне жаңа спорт алаңдарын бейнебақылау камераларымен жабдықтап, түнгі жарық жүйесін орнату жөнінде нақты тапсырмалар жүктелді.
Іссапар аясында аудан басшысы Желтоқсан және В.Счастнов көшелеріндегі көпқабатты тұрғын үйлер аулаларында салынып жатқан қоғамдық әжетханалардың құрылысымен де танысты. Бұл мәселе бұған дейін жергілікті тұрғындар тарапынан көтерілген болатын. Сонымен қатар тұрғындар үйлердің қасбетін жөндеу, шатырын жаңарту, қоқыс контейнерлерін орнату және кәріз суын төгетін арнайы орындар салу қажеттігін жеткізген еді.
Қазіргі таңда аталған мәселелер кезең-кезеңімен шешімін тауып, кенттің инфрақұрылымын жақсартуға бағытталған жұмыстар жүйелі түрде жүзеге асырылуда. Аудан басшысы барлық бастамалардың сапалы орындалуы тұрғындардың тұрмыс сапасын арттырудағы басты міндеттердің бірі екенін атап өтті.