«AMANAT» партиясында жол қауіпсіздігін күшейту мәселесі көтерілді

AMANAT партиясы Қызылорда облыстық филиалы жанындағы Сыбайлас жемқорлыққа қарсы іс-қимыл жөніндегі аймақтық кеңестің кезекті отырысында жол қауіпсіздігін қамтамасыз ету және жол-көлік оқиғаларының алдын алу мәселелері жан-жақты талқыланды. Өңірдегі көлік қозғалысының қауіпсіздігін арттыру, апат санын азайту және жауапты мекемелер арасындағы өзара іс-қимылды күшейту жиынның негізгі өзегіне айналды.
Кеңес отырысын кеңес төрағасы Мақсұт Нәлібаев жүргізді. Басқосуға Жандос Базартай, кеңес мүшелері, сондай-ақ күн тәртібіндегі мәселелерге жауапты мемлекеттік органдар мен мекемелердің басшылары қатысты.
Жиында өңірдегі жол қозғалысы қауіпсіздігінің қазіргі ахуалы сараланып, әсіресе облыс аумағын толық кесіп өтетін Батыс Қытай – Батыс Еуропа халықаралық автодәлізі бойындағы қауіпсіздік мәселесіне ерекше назар аударылды. Бұл күре жол арқылы тәулігіне мыңдаған көлік қатынайтынын ескерсек, жол-көлік оқиғаларының алдын алу, жол инфрақұрылымын талапқа сай ұстау және жүргізушілер тәртібін күшейту – уақыт күттірмейтін міндет екені атап өтілді.
Күн тәртібіндегі мәселе бойынша бірқатар сала басшылары баяндама жасады. Атап айтқанда, ҚР Көлік министрлігі Автомобиль көлігі және көліктік бақылау комитетінің облыс бойынша Көліктік бақылау инспекциясының басшысы Ербол Талекенов, ҚазАвтоЖол ұлттық компаниясының облыстық филиалының директоры Жасұлан Керімқұлов және Қызылорда облыстық полиция департаменті Әкімшілік полиция басқармасы бастығының орынбасары, полиция подполковнигі Нұркен Бақтияров атқарылып жатқан жұмыстар мен алдағы міндеттер жөнінде хабарлама жасады.
Жиын барысында сөз алған Жандос Базартай соңғы жылдары республика көлемінде жол-көлік оқиғаларының көбейіп, соның салдарынан зардап шеккендер санының артуы қоғам алаңдаушылығын күшейткенін айтты. Оның айтуынша, өңірлер арасында Қызылорда облысындағы көрсеткіштердің жоғары болуы жауапты құрылымдардың жұмысын жаңа деңгейге көтеруді талап етеді.
Сондай-ақ ол жол қауіпсіздігін қамтамасыз ету тек полиция немесе жол саласына жауапты мекемелердің ғана емес, бүкіл қоғамның ортақ міндеті екенін атап өтті. Осыған байланысты алдын алу шараларын жүйелеу, түсіндіру жұмыстарын жандандыру, жол сапасын бақылауды күшейту және мемлекеттік органдардың үйлесімді әрекетін арттыру қажеттігіне баса мән берілді.
Кеңес отырысының қорытындысында саладағы өзекті мәселелер бойынша нақты ұсыныстар айтылып, жауапты мекемелерге бірқатар тапсырмалар жүктелді. Сонымен бірге алдағы кезеңде жол-көлік оқиғаларының алдын алу бағытындағы жұмыстарды үйлестіру тетіктері нақтыланып, қауіпсіз жол мәдениетін қалыптастыруға басымдық беру қажеттігі белгіленді.