Алматы әуежайындағы фитосанитариялық бақылау кезінде Нидерланд пен Армениядан жеткізілген өнімдерден қауіпті карантиндік зиянкес анықталды. Инспекторлар залалданған тауарлардың Қазақстан аумағына әкелінуіне жол бермеді.
Ауыл шаруашылығы министрлігінің мәліметінше, импорттық өнімдерден батыс гүл трипсі анықталған. Бұл зиянкес өсімдіктерге зақым келтіретін қауіпті карантиндік организмдердің қатарына жатады.
Залалдану Нидерланд Корольдігінен жеткізілген салат көгінің партиясынан, сондай-ақ Армения Республикасынан әкелінген 600 дана кесілген гүлден анықталған.
Өнімдер Алматы әуежайындағы фитосанитариялық бақылау бекетінде тексерілген. Нәтижесінде залалданған партияларды ел аумағына кіргізуге тыйым салынды.
Ведомство мәліметінше, өнім иелеріне қатысты Қазақстан Республикасының өсімдіктер карантині саласындағы заңнамасын бұзу фактісі бойынша әкімшілік іс қозғалды.
Іс материалдары процессуалдық шешім қабылдау үшін сотқа жолданды.
