Ақтөбеде колледж жатақханасында болған қайғылы оқиға сотта қаралып жатыр. Айыптау нұсқасына сәйкес, 21 жастағы жоғары курс студенті Мәди Сүгірбай 16 жастағы Нұрбақыт Бақытты төртінші қабаттың терезесінен дүкенге жұмсаған.
Жасөспірім бес көрпені бір-біріне байлап, терезеден төмен түспек болған. Алайда үшінші және төртінші қабаттың арасында құлап, ауыр жарақат алған. Дәрігерлер 42 күн бойы өмірі үшін күрескенімен, Нұрбақыт ауруханада көз жұмды.
Сотта айыпталушының жарақат алған балаға қатысты «Жата берсін, шіріп» дегені де айтылды. Сондай-ақ жатақханада жоғары курс студенттерінің кішілерге әлімжеттік көрсеткені белгілі болды. Айыпталушы кінәсін мойындамай отыр.
«Мен баламды соларға сеніп тапсырдым!» — деген марқұмның анасы колледж бен жатақхана басшылығын да жауапқа тартуды талап етуде.
