Дәрігерге қастандық жасағандар қылмыстық жауапкершілікке тартылады, деп хабарлайды Kaztoday.kz.
Бұдан былай дәрігерге күш көрсетіп, жұмысына кедергі келтіргендер 3 жылға дейінгі бас бостандығынан айырылу жазасы қарастырылып отыр. Қылмыстық кодекске енгізілген 2 жаңа бап қоғам талқысына шығарылды.
Енді медицина қызметкерлерінің жұмысына кедергі келтіргендер 738 мың теңге айыппұл не 200 сағат қоғамдық жұмысқа тартылуы ықтимал. Тіпті 50 тәулікке қамау жазасы бар. Ал ақ халаттыларға қоқан-лоқы көрсетіп, қол көтеретіндерге 11 миллион теңге айыппұл салынады. Бұдан басқа 800 сағат қоғамдық жұмыс және 3 жыл түрме жазасы көзделген.
Бас прокуратураның мәліметінше, кейінгі бес жылда медицина қызметкерлеріне күш көрсетудің 200-ге жуық дерегі тіркелген.
