Семей қаласында жаңажылдық шыршаны безендіруге тартылған мұғалімдердің бірі жарақат алған қайғылы жағдай қоғамда үлкен резонанс туғызды. Осы оқиға аясында жүргізілген тексеріс нәтижесінде бірқатар жауапты тұлғалар жазаланды.
Семей қалалық білім бөлімінің басшысы қызметінен босатылды. Тексеру барысында әкімшілік құзыретіндегі жұмысты атқару үшін қаладағы үш мектептен мұғалімдер көмекке жіберілгені анықталды. Сонымен бірге, бұл мәселе бойынша білім бөлімінің басшысы мен мектеп директорлары тиісті басқарма басшыларына хабарламаған.
Тексеру нәтижесі бойынша үш мектептің директорына қатаң тәртіптік жаза қолданылды. Бұған қоса, қала әкімінің орынбасары жұмысты дұрыс ұйымдастырмағаны үшін қатаң сөгіс алды.
Қаланың бас шыршасын орнатуға 25 миллион теңге бөлінген. Әкімдік мәліметіне сәйкес, бұл қаражат жасанды желекті сатып алуға жұмсалған. Алайда шыршаны орнату жұмысы волонтерлерге жүктелуі тиіс болған. Соған қарамастан, мұғалімдерді жұмысқа тарту туралы шешім қабылданған.
Қазақстан Республикасының Оқу-ағарту министрі Ғани Бейсембаев бұл оқиғаны педагог мәртебесіне қайшы әрекет деп бағалап, мұғалімдерді кәсіби міндетіне жатпайтын жұмыстарға тартуға тыйым салынғанын ескертті. Министр облыс басшылығынан әділ және жан-жақты тексеріс жүргізуді талап етіп, алдағы уақытта мұндай жағдайлардың қайталанбауын қамтамасыз ету қажеттігін атап өтті.
Бұл оқиға мұғалімдердің құқықтары мен мәртебесін қорғау мәселесіне ерекше назар аударуды талап етеді. Зардап шеккен мұғалімге қажетті медициналық көмек көрсетіліп, жағдайы бақылауға алынған. Қоғамда мұндай келеңсіздіктердің болашақта қайталанбауы үшін тиісті шаралар қабылдануы қажет.
