Осыдан біршама уақыт бұрын Солтүстік Қазақстан облысында астан уланып көз жұмған екі бүлдіршіннің анасы әділдік іздеп, табан тоздырып жүр. Ауыл ішіндегі дүкеннен азық-түлік алып, ертеңіне қос сәбиінен қатар айырылған қаралы отбасы кінәлілер жазасыз қалғанын айтады, деп хабарлайды Kaztoday.kz.
Естеріңізге салайық, үстіміздегі жылдың 12 маусым күні Солтүстік Қазақстан облысы Қызылжар ауданында қайғылы жағдай тіркелген болатын. Ауыл тұрғыны Галина Коваленко дүкендердің бірінен тұшпара мен шұжық сатып алған. Кешкі астан соң өзінің де, балаларының да денсаулығы нашарлап жүрегі айни бастапты. Дереу медбикені шақыртқанымен, ол белсендірілген көмірден басқа дәрі бермеген. Соның салдарынан таңертең кіші ұлы қайтыс болып, кейін ауруханада қызы көз жұмады. Ал өзі мен үлкен ұлы аман қалады. Полиция әуелде «сантитарлық қағидаларды, немесе, гигиеналық нормативтерді бұзу» бабымен қылмыстық іс қозғаған. Кейін «қылмыс құрамы жоқ» деген желеумен іс қысқартылған.
“Мен жұмыстан келіп, кешкі асқа тұшпара ішіп, шұжық жеген соң бәріміз ауыра бастадық. Астан уланған екі балам қазір жер қойынында жатыр. Оларды маған ешкім қайтара алмайды. Ресми сараптама «нитраттан уланған» дейді. Ол үшін ешкім ешқандай жауапкершілік арқалаған жоқ. Мен әділдік орнап, кінәлілер жазалансын деп талап етемін”, — дейді марқұмдардың анасы.
