Қыздарға интимдік хаттар жазған донер жеткізушіге қылмыстық іс қозғалды, деп хабарлайды kaztoday.kz.
Атыраулық донер тасушы жігіт тамаққа тапсырыс берген қыз-келіншектерге, жасөспірімдерге ұятсыз фотолар мен хаттар жіберген.
Жаға ұстатар жайт жөнінде қоғам белсендісі Рүстем Баязиев желідегі жеке парақшасында баяндады. Айтуынша, курьер жігіт қыз-келіншектерді ватсап арқылы «тиісуді» бұрыннан әдетке айналдырған. Оның ішінде кәмелетке толмаған қыздар да бар. Жасөспірім қыздың анасы полицияға шағым түсірген.
«Донер жасайтын жігіт мектеп оқушысына интимдік хаттар жазып, кездескісі келетінін айтқан. Оның нөмірін қара тізімге жіберсе де, басқа әлеуметтік желіден тауып алып, артынан қалмаған. Осы постты шығарғаннан кейін маған бірнеше қыз-келіншектер жазып, осыған ұқсас жағдайлар болғанын айтты. Олардың барлығы бүгінгі күні полицияға арызданды»,- дейді Рүстем Баязиев.
Полиция 25 жастағы күдіктіні ұстаған.
«Аталған дерек бойынша қылмыстық іс қозғалды, сотқа дейінгі тергеп-тексеру амалдары жүргізілуде. Өзге ақпарат тергеу мүддесіне сәйкес жариялауға жатпайды», — деп жауап берді Атырау облыстық полиция департаментінің баспасөз қызметі.
