Әзербайжанда ұшақ апатынан қайтыс болғандардың несиесі кешірілді, деп хабарлайды kaztoday.kz Oxu.Az-ға сілтеме жасап.
Әзербайжанның банктері мен банктік емес несиелік ұйымдары Ақтауда апатқа ұшыраған ұшақта қайтыс болған азаматтардың несиелерін өтеп бермек.
Әзербайжан банктер қауымдастығының бірлескен мәлімдемесіне сәйкес, мұндай шешім қайғыға ұшырап отырған отбасыларға жанашырлық ретінде қабылданып отыр.
Қайтыс болған кісілердің несиелері банктердің өз қаражаты есебінен өтеледі.
«Баку-Грозный рейсінің экипаж мүшелері мен жолаушыларының қайғылы қазасы бүкіл елге, соның ішінде Әзербайжанның банк қауымдастығына ауыр тиді. Әзербайжан Орталық банкінің ұсынысы бойынша қаза тапқандардың қарыздары есептен шығарылды. Қаза тапқандардың отбасы мүшелеріне көңіл айтамыз және зардап шеккендердің сауығып кетуіне тілектеспіз», — деп жазылған хабарламада.
