Бүйрегін сатпақ болған атыраулықтың соты басталды, деп хабарлайды Kaztoday.kz.
Өзінің бүйрегін сатып ақша таппақ болған Атырау тұрғыны сот алдында жауап берді.
Тергеу мәліметтеріне сүйенсек, былтыр маусым айында айыпталушы Telegram-дағы «Бүйрек доноры» атты арнада бүйрегін сататыны жөнінде хабарлама қалдырған. Бұл жазбаға Ақтөбе полицейлері делдал арқылы жауап берген.
«2024 жылдың 14 қыркүйегінде Орынбасаров Атырау қаласында өз бастамасымен құқық қорғау органдарымен жұмыс істеген ақтөбелік тұрғынмен байланысқа шыққан. Тараптар бүйректің құнына 9 млн теңге деп келіскен», – делінген хабарламада.
Орынбасаров 20 қыркүйек күні Ақтөбеге келіп, медициналық тексерістен өткен. Ал 25 қыркүйекте бүйректі сатып аламын деген адамнан 5 млн теңге алдын ала төлем алу сәтінде ұсталған.
Сотта айыпталушы кінәсін толық мойындап, мұндай әрекетті қаржылық қиындық салдарынан жасағанын айтты.
«Менің қарыздарым болды. Ашуланған күйімде Telegram арнасына хабарлама жаздым да, арнадан бірден шығып кеттім. Басқа есім қолдандым. Қыркүйек айында маған хабарласып, анализ тапсыруды өтінді. Ақтөбеге барып, анализ тапсырдым. Маған ақша төледі, пәтер жалдады. 25 қыркүйекте ақша алып жатқан кезде ұсталдым. Біз 9 млн теңгеге келіскенбіз. Бір бөлігі операцияға дейін, қалғаны операциядан кейін берілуге тиіс еді. Ақшаны санамадым, тексерген жоқпын», – деді Орынбасаров.
Қазіргі уақытта ол ешқайда кетпеу туралы қолхатпен босатылған.
