Ертіс өзеніне құлаған көліктен тағы бір адамның денесі табылды, екінші адам іздестіріліп жатыр, деп хабарлайды kaztoday.kz.
10 қаңтарда түн ортасы шамасында кезекші пультіне балықшылардан бір адамның денесін судан тауып, жағаға алып шыққаны туралы хабарлама түскен.
Осыдан кейін төтенше жағдайлар қызметі дер кезінде оқиға орнына барған.
Судан шығарылған марқұмның туыстары таныған. Тағы бір жоғалған адамды іздеуге 100-ден астам адам, 13 моторлы қайық, 2 ұшқышсыз ұшу аппараты, 3 гидроакустикалық құрал және 1 су асты дроны жұмылдырылған.
«Ауа райының қолайсыздығын ескере отырып, апаттардың алдын алу үшін Абай облысының төтенше жағдайлар департаменті қала тұрғындары мен қонақтарын қыста су қоймаларына жақын бармауға шақырады», — деді ведомство өкілдері.
Бұған дейін, Ертіс өзеніне көлік құлап кеткені жөнінде жазған едік.
ТЖМ мәліметінше, жеңіл автокөлік жүргізушісі бетон қоршаумен соқтығысып, өзенге құлаған. Көлік ішінде 4 адам болған. Жолаушылардың бірі өзі жүзіп, жағаға шыққан. Одан соң іздестіру жұмыстарының нәтижесінде бір жолаушының денесі табылған.
