226 медицина қызметкерінің есірткі қылмысына қатысы бары анықталды, деп хабарлайды kaztoday.kz.
Түркістан облысында 48 жастағы жүргізушінің көлігінен полиэтилен пакеттері мен қораптар табылды. Тексеру барысында ол заттардың 2500-ге жуық «трамадол» таблеткасы екені белгілі болып, тәркіленген. Көлік жүргізушісі таблеткаларды дәріханадан жалған рецепт көрсетіп алып алған.
Аталған препарат есірткі заттарына жатады және арнайы тізімге енгізілген.
Қылмыс дерегі Ішкі істер органдары жүргізген «Дәрмек жедел алдын алу іс-шарасының нәтижесінде анықталып отыр. Сондай-ақ, есірткі қылмысы бойынша 8 қылмыстық және 633 әкімшілік құқық бұзушылық белгілі болған.
Оның ішінде заңсыз фармацевтикалық қызмет бойынша 46 дерек, дәрілік заттардың айналымы мен ережелердің бұзылуына байланысты 260 дерек анықталды. 500-ден астам лауазымды тұлға, оның ішінде 226 медицина қызметкері әкімшілік жауапкершілікке тартылды.
Ішкі істер министрлігі дәріханалар мен фармацевтикалық компаниялардың басшыларына және қызметкерлеріне медицинада пайдаланылатын есірткі және психотроптық заттардың айналымын реттейтін заңнаманы қатаң сақтауға шақырады. Бұл саладағы құқық бұзушылықтар үшін қылмыстық жауапкершілік барын еске саламыз, – деді ІІМ есірткі қылмысына қарсы іс-қимыл комитеті төрағасының орынбасары Қуандық Әлжанов.
