Судьяны қорлағаны үшін 2,5 миллион теңге айыппұл салынды, деп хабарлайды kaztoday.kz.
Түркістан облысында Facebook пайдаланушысы судьяның ар-намысына тиіп, айыппұл төлеуге міндеттелді.
64 жастағы Шымкент тұрғыны, қоғам белсендісі әрі блогер, Facebook әлеуметтік желісінде судьяға бағытталған қорлайтын пікір жариялағаны үшін сот шешімімен 2,5 миллион теңге төлеуге міндеттелді.
Блогер Түркістан облыстық сотының судьясына арнап жазған пікірінде жеке сипаттағы, шындыққа жанаспайтын, бірақ судьяның ар-намысы мен беделіне нұқсан келтіретін мәліметтер жариялаған. Сондай-ақ ол бұл жазбаны әлеуметтік желідегі бірнеше топқа таратып, көпшілік назарына жеткізуді мақсат еткен.
Сараптама нәтижесінде бұл әрекеттер судьяның кәсіби беделіне және жеке абыройына айтарлықтай зиян келтіргені анықталды. Осыған байланысты блогерге ҚР Қылмыстық кодексінің 411-бабының 1-бөлігі (Судьяға жала жабу) бойынша қылмыстық іс қозғалды.
Сотта айыпталушы кінәсін жартылай мойындап, тек материалдық шығынды өтеуге келісімін білдірді, бірақ моральдық зиянды өтеуден бас тартты. Судья талап ретінде 5 миллион теңге моральдық зиянды және 500 000 теңге процессуалдық шығындарды өтеуді ұсынды.
Сот шешімі бойынша блогер 500 000 теңге материалдық шығынды және 2 миллион теңге моральдық зиянды төлеуге міндеттелді. Қылмыстық жауапкершіліктен ол ескіру мерзіміне байланысты босатылды, бірақ азаматтық талап бойынша өтемақы төлеуі тиіс.
Айыпталушының бұған дейін де бірнеше рет заң бұзғаны белгілі болды. 2018 жылы ол жеке деректерді заңсыз пайдалану, топтық бұзақылық және порнографиялық материалдарды тарату бойынша сотталған. Ол кезде сот төрағасы қазіргі іс бойынша шағымданған судья болған.
