Жамбыл облысында бірнеше жыл бойы тұрғындар мен кәсіпкерлерді қорқытып келген қылмыстық топ қолға түсті, деп хабарлайды Kaztoday.kz.
Тергеу мәліметіне сүйенсек, бұрын сотталған 7 адам қылмыстық топ құрған. Олар 2 жыл бойы қайырымдылық қордың атын жамылып, кәсіпкерлерді қорқытып, ұрып-соғып бопсалау арқылы қарызды мәжбүрлеп өндіріп алу және қорғаншылық көрсетумен айналысқан.
Қылмыстық топты 2023 жылдың сәуір айында облыс прокуратурасының үйлестіруімен облыстық ПД-нің қызметкерлері жедел іс-шаралар кешенінің нәтижесінде әшкереледі.
Құзырлы орган өкілдері бұл қылмыстық топ мүшелеріне қатысты бірқатар қылмыстардың мән-жайын анықтаған.
Мысалы, олар топтың көшбасшысының нұсқауы бойынша Меркі ауданындағы 2 жәбірленушіге күш қолданып, 1 миллион теңге және 10 келі есірткі заттарын талап еткен.
Жәбірленушілердің бірі қорқып, «Kaspi» қосымшасы арқылы 500 000 теңге көлемінде қаражат аударған. Ол ақшаны ұйымдасқан қылмыстық топ мүшелері бөліп алған.
Осы сияқты қылмыстық схема бұдан өзге 4 кәсіпкерге де жасалған.
2025 жылдың 21 қаңтарында сот талқылауының қорытындысы өтті. Нәтижесінде Жамбыл облысының қылмыстық істер жөніндегі мамандандырылған ауданаралық соты ұйымдасқан қылмыстық топтың басшысы мен мүшелеріне қатысты айыптау үкімін шығарды.
Сот үкімімен ұйымдасқан қылмыстық топтың жетекшісі 11 жылға, басқа қатысушылар 8 жылдан 10 жылға дейін бас бостандығынан айырылды.
Үкім заңды күшіне енген жоқ.
