Павлодарда бес жасар баланың жыныс мүшесінің үштен бірі қателесіп кесілген, ал несеп жолына зақым келген, деп хабарлайды Kaztoday.kz.
Оны сүндеттеу операциясы кезінде жасаған деп балалар хирургі айыпталуда. CMN.KZ бұл оқиға бойынша қылмыстық істің қазіргі жай-күйін Павлодар қаласының №2 сотының баспасөз қызметінен білді.
Оқиға 2023 жылдың тамызында болған. Қалыпты саналған сүндеттеу операциясынан кейін баланың жағдайы ауырлап кеткен. Оны тез арада Нұр-Сұлтандағы Ана мен бала орталығына жіберуге мәжбүр болды. Сол уақытта хирургке қатысты қызметтік тергеу басталып, ол ота жасаудан уақытша шеттетілді.
Жәбірленушінің анасы болған жағдайды жергілікті Telegram-арна kerek.pv арқылы толық баяндап берді. Оның айтуынша, баласының жыныс мүшесінің үштен бірі кесіліп, несеп шығару каналы зақымданған. Анасы бұл жағдайды дәрігердің қателігі деп санады. Кейінірек оның күдігі расталды.
«Сүндеттеу кезінде жіберілген қателік үшін хирургке қатаң сөгіс берілді және оны екі ай мерзімге операциялардан шеттетті. Кейін дәрігер өз еркімен жұмыстан шықты», – деп хабарлаған еді pavon.kz порталы 2023 жылдың қараша айында, облыстық Денсаулық сақтау басқармасына сілтеме жасап.
Біраз уақыт өткен соң хирургке қарсы қылмыстық іс қозғалды. Іс материалдары 2025 жылдың қаңтарында сотқа жіберілді. Павлодар сотының өкілдері CMN.KZ тілшісіне басты сот процесінің жақын арада басталатынын растады. Қазіргі таңда алдын ала тыңдаулар өтуде. Алайда, бұл баланың құқығын қорғау мақсатында жабық режимде қаралып жатыр.
Айта кетсек, 2024 жылдың 2 ақпанында Солтүстік Қазақстан облысында дәл осындай сүндеттеу операциясынан кейін 10 жасар бала қайтыс болды.
Фото: freepik.com
