Атыраулық әйел депутат күйеуінен 12 жыл зорлық көргенін айтты, деп хабарлайды Kaztoday.kz.
Атырау қаласының тұрғыны, төрт баланың анасы Нұржамал Тәжғалиева Қазақстан Президентіне ашық хат жолдап, бұрынғы күйеуі – облыстық мәслихат депутаты Айбар Ерекешовты жылдар бойы жасаған тұрмыстық зорлық-зомбылық, алимент төлемеу және мүлкін заңсыз иемденуге тырысу бойынша айыптады.
«12 жыл бойы қорлық көрдім»
Нұржамал Тәжғалиева 12 жыл бойы бұрынғы жұбайының қорлығы мен соққысына шыдағанын мәлімдеді. Көпбалалы ана Facebook парақшасында жариялаған үндеуінде күйеуінің тарапынан көрген қатыгездікті егжей-тегжейлі сипаттаған.
«2018 жылы ол мені ұялы телефонымен ұрып, басымды жарды. Сол кезде мен нәрестемді емізіп отырған едім. Ал 2023 жылы 120 килограмдық денесімен үстіме отырып, тағы да соққыға жықты. Ата-анасы күйеуімді «балалардың қамы үшін өзгеремін» деп уәде берді. Бірақ ол ешқашан өзгерген жоқ», – дейді Нұржамал.
Алимент қарызы мен сот даулары
Ажырасқаннан кейін депутаттың балаларға төлеуі тиіс алимент қарызы алты миллион теңгеге жеткен. Әйелдің айтуынша, бұрынғы күйеуі алиментті сот арқылы мойындамауға тырысып, тіпті балаларды өз қарамағына алғысы келеді.
Бұған қоса, Нұржамалдың айтуынша, экс-күйеуі үлкен қызын алдап, өзімен алып кеткен.
«Қазір ол әлеуметтік желілерде ешқандай бақылаусыз отыр, тіпті анасына тіл тигізетін контенттерді бөлісіп жүр», – деп алаңдайды әйел.
Полиция депутаттың әрекетін бүркемелей ме?
Нұржамалдың айтуынша, жергілікті полиция оның арызын әрең қабылдаған.
«Маған зорға қорғаныс нұсқамасын берді. Бірақ оны маған да, бұрынғы күйеуіме де бірдей рәсімдеді. Себебі мен оны «мазаламауым» керек екен. Ол маған «Бұл шешімді полицейлер өздері ұсынды» деп айтты», – дейді ол.
Президентке үндеу: әділдік талап етемін
Нұржамал Тәжғалиева Президент Қасым-Жомарт Тоқаевтан әділдік талап етіп, Айбар Ерекешовке қарсы қылмыстық іс қозғауға көмектесуді сұрады.
«Әйелін ұрып-соғып, балаларынан бас тартып, мүлкін иемденгісі келген адам депутат болып қала алмайды! Мен өзім және балаларым үшін әділдік пен қорған сұраймын. Мемлекет мені естиді деп үміттенемін», – деді Нұржамал өз Үндеуінде.
Депутат бұрынғы әйелі жала жауып отырғанын айтты
Айбар Ерекешов бұрынғы әйелінің айыптауларына қатысты әлеуметтік желіде, тікелей эфирде жауап берді. Оның айтуынша, балаларының анасы, бұрынғы әйелі жала жауып отыр.
Мен Нұржамалмен ресми түрде 2023 жылы ажырасып кеттім. Иә, 2018 жылы басынан жарақат алған болатын, бірден ауруханаға барды. Бірақ оқиға қалай болғанын нақтылап айту керек. Ол үйге мас күйде келіп, құлап түсті. Артынша жол апатына түсіп, басынан жарақат алды. Ол кезде бірге тұрмайтынбыз. Оған ешқашан қол көтерген емеспін. Бір жағдай ғана болған, оны басқаша жеткізген, ол кезде қызым екеуін ажыратпақ болғанмын, деді мәслихат депутаты.
Депутат ажырасуға әйелі бірінші болып бастама көтергенін айтты.
Ол Еуропадан келгеннен кейін, ажырастық. Ол емізулі баланы қалдырып кетіп, Еуропада бір айдай жүрді. Оның талабы бойынша екі пәтер мен автокөлікті бердім. Алимент керек емес деп мәлімдеген өзі. 2024 желтоқсанында жағдай өзгерді. Ол ойланып, қайтадан алимент талап етті. Сот орындаушы есептеп, қаңтардан бастап төлей бастайтынымды айтты. Ешқашан өз міндетімнен қашқан емеспін, дейді Айбар Ерекешов.
Полиция не дейді?
Атырау облыстық полиция департаментінің мәліметінше, бұл іс бойынша тергеу амалдары жүргізіліп жатыр.
«Жарияланған фотосуреттер 2018 және 2023 жылдарға тиесілі. 1987 жылы туған азаматша 2018 және 2023 жылдары полициядан қорғаныс нұсқамасын алған, бірақ кейін оны өзі қайтарып алған. 2024 жылы аталған қорғаныс нұсқамасы әйелдің де, оның бұрынғы күйеуінің де өтініші бойынша рәсімделді. Себебі олардың бір-бірін телефон арқылы мазалағаны анықталды», – деп мәлімдеді полиция өкілдері.
