Ақылы жолдардан түскен қаражаттың қайда жұмсалып жатқаны белгілі болды, деп хабарлайды Kaztoday.kz.
Былтыр Қазақстандағы ақылы жолдардан 48 млрд теңге түскен. Көлік министрлігі бұл соманың қайда жұмсалып жатқанын айтты.
Көлік министрі Марат Қарабаевтың сөзінше, жолдарда күтіп ұстау үшін қаражат қажет.
Бюджетке түсетін жүктемені азайтып, жол өзін-өзі ақтауы үшін реконструкция және жөндеу жұмыстары аяқталған учаскелерде «ақылы» статус кезең-кезеңімен енгізіліп жатыр. Қазір республика бойынша ұзындығы 3 мың 200 шақырым ақылы жол жүйесі жұмыс істейді, деді көлік министрі.
2024 жылы ақылы жолдардан түскен қаржы жолдарды күтіп ұстауға, қоршау салып, жарығын қамтуға жұмсалған.
Биыл қосымша 4 мың шақырым жол ақылы болады. Олардан келетін түсімдер биыл — 60 млрд, ал келер жылы 100 млрд теңгеге дейін жеткізілмек. Бұл ретте, осы ақылы жолдардан түскен қаражаттың бір бөлігін құрылыс жұмыстарына алынған қарыздардың пайыздық мөлшерлемелерді өтеуге жұмсау мәселесі қарастырылып жатыр, деді министр М. Қарабаев.
