Адвокат Бауыржан Азанов Астана қаласының әуежайында орын алған шабуылға қатысты тергеудің әділетсіз өтіп жатқанын мәлімдеді, деп хабарлайды Kaztoday.kz.
Оның айтуынша, бейнебақылау камералары төртеу болып келісіп, оған қарсы шабуыл жасауды жоспарлаған сәтті анық көрсеткен. Бұл жағдай топпен алдын ала сөз байласып жасалған бұзақылық ретінде қарастырылуы керек еді.
«Алайда, тергеуші Айжан Советханова істі жеңіл бұзақылық ретінде бағалап отыр», – дейді Бауыржан Азанов.
Айтуынша, тергеу барысында көптеген кемшіліктер жіберілген. Атап айтқанда:
— Фото-техникалық сараптама қорытындысымен таныстырылмады. Бұл туралы дәлел ретінде 30 минуттық аудиожазба бар.
— Қылмыстық істің материалдарымен танысу мүмкіндігі берілмеді. Ешқандай ресми хабарламалар алынбаған.
— Конституциялық құқықтар бұзылды. Сотқа дейінгі тергеу барысында адвокаттың құқықтары шектелді.
— Күдіктілер мен куәгерлер арасында беттестіру жүргізілмеді.
— Алдын ала тергеудің аяқталғаны туралы хабарлама жіберілмеген. Тіпті телефон арқылы да хабарланбаған.
— Іс сотқа жіберілгенімен, қорғаушы тарап таныстырылмады. Іс 2025 жылдың 17 ақпанында сотқа жөнелтілген.
— Сот отырысы 2025 жылдың 26 ақпанына белгіленді. Бірақ адвокат сот процесі жайлы ресми түрде хабарлама алмаған.
— Процедуралық бұзушылықтар көп. Тергеу барысында заң талаптары сақталмаған.
Адвокаттың айтуынша, екі түрік азаматы өздеріне тиесілі бутиктерде жұмыс істейтін екі ресейлікке шабуыл жасауға бұйрық берген. Бейнежазбада төртеуі алдын ала ақылдасып жатқан сәт анық көрінеді. Осыдан кейін екі ресейлік адвокатқа шабуыл жасаған. Бұл жағдай Қазақстан Республикасының Қылмыстық кодексі бойынша топтық шабуыл ретінде қарастырылуы тиіс.
«Неліктен тергеуші Айжан Советханова топтық шабуылды жеңіл бұзақылық деп бағалады? Тергеушілердің біліктілігі қандай деңгейде? Неліктен тергеу барысында көптеген заң бұзушылықтар орын алды? Түркия азаматтары Ресей азаматтарына мені көрсетіп, қолымен түртіп, маған шабуыл жасауға бұйрық берген. Ресей азаматтары бұл бұйрықты еш қарсылықсыз орындады. Шабуыл кезінде мен қорғану үшін дайындық ұстанымын қабылдағаннан кейін де, ресейлік азамат мені қуып, шабуылын жалғастырмақ болды. Алайда белгілі бір себептерге байланысты өз ойын соңына дейін жүзеге асыра алмады.
Бұл жағдай Қазақстан Республикасының Қылмыстық кодексінің 293-бабының 2-бөлігі бойынша – «Алдын ала сөз байласқан топпен жасалған бұзақылық» деп бағалануы керек», – дейді Бауыржан Азанов.
Сондай-ақ, ол Астана қаласының әуежайындағы желілік полиция бөлімі қызметкерлері бұл ауыр қылмысты жасырып, ҚР ҚК 433-бабының 4-бөлігі бойынша – «Ауыр қылмысты жасыру» дерегімен қылмыстық жауапкершілікке тартылуы тиіс екенін айтты.
«Желілік полиция бөлімі бұл істі ауыр қылмыстан әкімшілік құқық бұзушылық ретінде қарастырып, істі «ұрып-соғу» бабымен бағалаған. Бұл — заң талаптарына ашық түрде қайшы. Неліктен Ресей және Түркия азаматтары өздерінің жазаланбайтынына сенімді?» – дейді Бауыржан Азанов.
Адвокат бұл істің әділ тергелуін талап етіп, Қазақстан Республикасының Бас прокуратурасына жүгінуде. Ол азаматтардың құқықтарын қорғау және әділ сот процесін қамтамасыз ету үшін тиісті органдардан нақты әрекеттер күтетінін жеткізді.
Бұған дейін 22 желтоқсанда, оқиғадан бір ай өткен соң, адвокат Азановпен Астанада белгісіз адам кездесіп, оған 5 миллион теңге көлемінде пара ұсынып, өзінің берген түсініктемесін өзгертуін талап еткені туралы жазған едік.
