Қостанайдағы сауда ойын-сауық орталығының әкімшісіне белгісіз нөмірден хабарлама келіп, ғимаратта жарылғыш зат бары ескертілген, деп хабарлайды kaztoday.kz.
Мұны қауіпсіздік қызметінің бастығы дереу тиісті органдарға жеткізген.
Арнайы қызмет өкілдері келіп, сауда орталығының ғимаратын және оның аумағын мұқият тексеріп шықты. Жарылғыш зат табылған жоқ.
Қостанай облысы полиция департаментінің экстремизмге қарсы іс-қимыл басқармасының мәліметінше, жалған ақпарат берген күдікті табылған.
Ол – облыс мектептерінің бірінде оқитын 8-сынып оқушысы. Жасөспірім өз кінәсін мойындап, бұған дейін де осындай жалған хабарлама жасағанын растады. Атап айтқанда, 26 ақпанда ол Садчиков мектебінде бомба бар деп хабарлаған. Қазіргі уақытта тергеу амалдары жүргізіліп жатыр. Кәмелетке толмаған оқушы мен ата-анасының, психологтың және әлеуметтік педагогтың қатысуымен жұмыс жүргізіліп жатыр, деп мәлімдеді Қостанай облысы полиция департаментінің экстремизмге қарсы іс-қимыл басқармасының өкілдері.
