Қызылордада «AMANAT» партиясы фракциясының отырысында өңір дамуына қатысты өзекті мәселелер талқыланды

Қызылорда облыстық мәслихатындағы «AMANAT» партиясы депутаттық фракциясының кезекті отырысында өңірдің әлеуметтік-экономикалық дамуына қатысты бірқатар маңызды мәселелер кеңінен қаралды. Жиында партияның сайлауалды бағдарламаларын іске асыру барысы, партиялық жобалардың нәтижелілігі және депутаттық жұмыстың тиімділігін арттыру бағыттары талқыланды.
Басқосуға облыс әкімінің бірінші орынбасары Данияр Жаналинов, фракция жетекшісі Жорабек Нұрымбетов, сондай-ақ облыстық басқарма басшылары мен жауапты сала өкілдері қатысты.
Күн тәртібіндегі негізгі мәселелердің бірі – «AMANAT» партиясының 2023–2027 жылдарға арналған «Халықпен бірге!» сайлауалды бағдарламасының өңірлік Жол картасының орындалу барысы болды. Отырыста аталған құжат аясында жүзеге асқан жұмыстар сараланып, алдағы кезеңге арналған басым міндеттер нақтыланды. Жол картасындағы жобаларды уақытылы әрі сапалы орындау мәселесіне ерекше назар аударылды.
Сонымен қатар, партия бастамасымен жүзеге асырылып жатқан бірқатар маңызды жобалардың өңірдегі нәтижелері де талқыға түсті. Атап айтқанда, ауыл тұрғындарының табысын арттыруға бағытталған «Ауыл аманаты», жер ресурстарын тиімді пайдалануды көздейтін «Жер аманаты», азаматтардың қаржылық сауатын көтеруге арналған «Қарызсыз қоғам» және цифрлық сауаттылықты дамытуға бағытталған «Цифрлық қоғам» жобалары бойынша атқарылған жұмыстар жөнінде жауапты сала мамандары баяндама жасады.
Жиында депутаттардың мемлекеттік органдарға жолдаған сауалдарының орындалу деңгейі де жан-жақты сөз болды. Сонымен бірге, тұрғындар тарапынан көтерілген талап-тілектердің шешілу барысы, халықпен кері байланысты күшейту, есептік кездесулерді жүйелі ұйымдастыру мәселелері қарастырылды.
Отырыс барысында депутаттар жауапты орган басшыларына нақты сауалдар қойып, өңір үшін маңызды бастамалар мен ұсыныстарын ортаға салды. Нәтижесінде бірқатар ұсыныстар хаттамаға енгізілді. Олардың қатарында депутаттық сауалдардың орындалуына тұрақты мониторинг жүргізу, Жол картасындағы іс-шаралардың сапалы жүзеге асырылуын бақылау және мемлекеттік органдар жұмысының тиімділігін арттыру секілді міндеттер бар.
Сондай-ақ партияның облыстық филиалы жанындағы партиялық бақылау комиссиялары мен қоғамдық кеңестерге Жол картасының орындалуына тұрақты бақылау жүргізу арқылы партиялық бақылауды күшейту тапсырылды.
Жалпы, фракция отырысында көтерілген мәселелер Қызылорда өңірінің әлеуметтік-экономикалық дамуын жеделдетуге, халықтың тұрмыс сапасын арттыруға және ел сенімін ақтайтын нақты нәтижелерге қол жеткізуге бағытталған маңызды қадамдар ретінде бағаланды.