Қазалы ауданында оқу жылының аяқталуы қарсаңында жасөспірімдер арасындағы құқықбұзушылықтың алдын алу және балалар қауіпсіздігін қамтамасыз ету мәселелеріне арналған кеңейтілген мәжіліс өтті. Роза Бағланова атындағы аудандық мәдениет орталығында ұйымдастырылған «Қауіпсіз қоғам: тәртіп, тәрбие, жауапкершілік» атты жиынға құқық қорғау органдарының өкілдері, мәслихат депутаттары, білім саласының мамандары, ата-аналар комитеттері мен қоғамдық ұйым жетекшілері қатысты.
Жиында аудан көлеміндегі білім саласындағы өзекті мәселелер мен жасөспірімдер арасындағы құқықбұзушылықтың алдын алу бағытындағы жұмыстар кеңінен талқыланды. Мәжілісте сөз алған аудан басшылығы Мемлекет басшысы Қасым-Жомарт Тоқаевтың білім мен тәрбиенің қатар жүруі туралы пікіріне тоқталып, жас ұрпақтың бойына ұлттық құндылықтарды сіңірудің маңызын атап өтті.
– Жас буын отаншыл, білімді, еңбекқор әрі жауапкершілігі жоғары болып қалыптасуы қажет. Қауіпсіз әрі тәртіпке бағынған қоғам құру – баршамызға ортақ міндет. Бұл ретте мектеп, ата-ана және қоғам арасындағы байланыс нығаюы тиіс, – деді жиын барысында.
Кеңейтілген мәжілісте аудан прокуроры Мадияр Бекпанов жасөспірімдер арасындағы құқықбұзушылықтың алдын алу – барлық мекеме мен қоғамның ортақ жауапкершілігі екенін айтты. Сонымен қатар түнгі рейдтік іс-шараларды тек аудан орталығында ғана емес, ауылдық округтерде де тұрақты ұйымдастыру қажеттігін жеткізді.
Жиын барысында №170 мектептің ата-аналар комитетінің төрағасы Жеңісбек Аралбаев отбасы тәрбиесінің рөліне тоқталып, бала тәрбиесіндегі ата-ананың жауапкершілігі жөнінде пікір білдірді.
Мәжілісте соңғы қоңырау мен аттестат табыстау рәсімдерін талапқа сай өткізу, балалардың жазғы демалысын қауіпсіз әрі мазмұнды ұйымдастыру, интернетке тәуелділік пен әлімжеттіктің алдын алу мәселелері де жан-жақты қаралды. Сондай-ақ су айдындарындағы қауіпсіздік, жол қозғалысы ережелерін сақтау, жазғы лагерьлердің дайындығы және санитарлық талаптардың орындалуы жөнінде жауапты сала басшыларының хабарламалары тыңдалды.
Бұдан бөлек, жиында Мемлекет басшысының бастамасымен жүзеге асып жатқан «Таза Қазақстан» экологиялық акциясының маңызы айтылып, тұрғындар қоғам тазалығы мен экологиялық мәдениетті қалыптастыруға белсенді атсалысуға шақырылды.
Кездесу қорытындысында көтерілген мәселелер бойынша жауапты мекеме басшыларына нақты тапсырмалар беріліп, олардың орындалуын бақылау салаға жетекшілік ететін орынбасарға жүктелді.
