Қарағанды облысында саяжайлардың бірінде екі адамның өліміне қатысты қылмыстық іс тергеліп жатыр.
Полицияның хабарлауынша, 6 қыркүйекте Әлихан Бөкейхан ауданындағы саяжайлардың бірінен 43 жастағы ер адам мен 55 жастағы әйелдің мәйіті табылған. Екеуінің де денесінен оқ жарақаты анықталған.
Оқиғаға байланысты «Кісі өлтіру» бабы бойынша қылмыстық іс қозғалған.
Жүргізілген жедел-іздестіру және тергеу жұмыстары нәтижесінде полиция күдікті ретінде 56 жастағы ер адамды ұстаған. Ведомствоның мәліметінше, ол өз кінәсін мойындаған.
Қазіргі таңда күдікті уақытша ұстау изоляторына қамалды. Тергеу барысында қылмыстың нақты себептері мен барлық мән-жайы анықталып жатыр.
Әлеуметтік желілерде марқұм ер адамның саяжай бірлестігінің төрағасы әрі заңгер болғаны, ал әйелдің қоғамдық жұмыстарға белсенді араласқаны жазылуда. Сондай-ақ қылмысқа саяжай бірлестігін басқаруға қатысты келіспеушілік себеп болуы мүмкін деген болжам тараған.
Алайда бұл мәліметтер әзірге полиция тарапынан ресми расталған жоқ. Тергеу жалғасып жатыр.
