«БАЛАНЫ ТУДЫМ, ЕНДІ ЖАЛҒЫЗ ӨСІРІП ОТЫРМЫН»: СУРРОГАТ АНАНЫҢ ЖАНАЙҚАЙЫ
Грузияда Қытай азаматтарына суррогат ана болуға келіскен қазақстандық әйел күтпеген жағдайға тап болды. Оның айтуынша, жүктілік басталғаннан кейін тапсырыс берушілермен арада келіспеушілік туындап, ақыры сәби өз тәрбиесінде қалған.
Мадина есімді келіншек бұған дейін өт қабы жарылып, ауыр ота жасатқан. Денсаулығына байланысты жұмыс істеу мүмкіндігінен айырылған ол қаржылық қиындықтан шығу үшін суррогат ана болуға шешім қабылдаған. Таныстары арқылы Грузияға барып, Қытай азаматтарымен келісімшарт жасасып, жасанды ұрықтандыру рәсімінен өткен.
Алайда жүктілік кезінде клиника дәрігерлері мен баланың биологиялық ата-анасы арасында дау туындаған. Мадинаның сөзінше, одан келісімшартты бұзуды, кейін Қазақстанға оралған соң жүктілікті тоқтатуды талап еткен. Әйел бұған келіспей, сәбиді дүниеге әкелген.
Қазір Мадина алты айлық баланы жалғыз тәрбиелеп отыр. Ол сәбидің биологиялық ата-анасынан алимент өндіру үшін сотқа жүгінуге ниетті.
Бұл оқиға суррогат ананың құқығы, биологиялық ата-ананың жауапкершілігі және баланың болашағына қатысты күрделі мәселелерді көтеріп отыр.
