Ақтөбеде кепілге алынған ерлі-зайыптылардың жаназасы шығарылды, деп хабарлайды kaztoday.kz.
13 қаңтар күні Ақтөбеде өз үйлерінде кепілге алынған ерлі-зайыпты көз жұмған еді. Полиция қызметкерлері қаскөйден құтқарғанымен, 74 жастағы Ә. және оның жұбайы 66 жастағы Ш. қайтыс болған.
16 қаңтар күні олардың жаназасы шығарылды. Үй маңына көптеген адам жиналды. Ішінде полиция қызметкерлері мен медициналық жедел жәрдем көліктері де бар.
Марқұмдардың жақындары оларды қала шетіндегі зиратқа жерледі.
Осы оқиға кезінде кепілде болған 40 жастағы әйел қазір ауруханада жатыр. Ақтөбе облыстық денсаулық сақтау басқармасының мәліметінше, оның жағдайы тұрақты, беті бері қарап келеді. Әйелдің жатқан палатасын полиция күзетуде.
Айта кетерлігі, қайтыс болған адамдар – әйелдің анасы мен өгей әкесі. Бірақ ол әзірге олардың қайтыс болғанынан хабарсыз.
