Сенатор Марат Қожаев жол қозғалысы ережелерін үнемі бұзатын жүргізушілер үшін айыппұл төлеуге берілетін 50 пайыздық жеңілдікті алып тастауды ұсынды, деп хабарлайды Kaztoday.kz
Өткен жылы Алматыда ЖҚЕ бұзу деректері төрт миллионнан асты. Қожаевтың айтуынша, жүргізушілер ережелерді қасақана елемейді.
«Бір ғана жүргізуші жыл ішінде 143 рет ереже бұзып, үш миллион теңгеден астам айыппұл төлеген. Бірақ соған қарамастан, заң бұзуды жалғастырып келеді», – деді депутат мысал келтіріп.
Кейбір жүргізушілер айыппұл жеңілдіктерін пайдаланып, оны тек болмашы шығын ретінде қабылдайды.
«Престижді көлік маркалары мен ерекше нөмірлерге қарап, көбіне бұлар ауқатты отбасылардың жас өкілдері екенін аңғаруға болады. Олар ЖҚЕ-ні қасақана бұзып, жолда қауіпті жағдай тудырады, ережелерді өрескел бұзады», – деді сенатор.
Премьер-министрге жолдаған сауалында сенатор келесі шараларды енгізуді ұсынды:
▪️ ЖҚЕ-ні 10 және одан көп рет бұзған жүргізушілер үшін теориялық емтиханды қайта тапсыруды міндеттеу;
▪️ Қайталанған құқық бұзушылықтар үшін жауапкершілікті күшейту, тіпті уақытша жүргізуші куәлігінен айыруға дейін шара қолдану;
▪️ Бұзушылықтардың жиілігін ескере отырып, сараланған жаза жүйесін әзірлеу;
▪️ Жол ережесін үнемі бұзатындар үшін 50 пайыздық айыппұл жеңілдігін толығымен алып тастау.
Қаңтар айының соңында Мәжіліс депутаты Асхат Аймағамбетов Қазақстанды «Штрафстанға» айналдырмау жолдары туралы айтқан болатын.
Фото: Envato Elements.
