Атырауда тұмшаланған бойжеткендер мемлекеттік туды өзгертіп, суретке түскен. Желіні шарлаған сурет көптің ашуын туғызды, деп хабарлайды kaztoday.kz.
Атырау облыстық полиция департаментінің мәліметінше, суретке түскендер полиция бөлімшесіне жеткізілген. Олардың екеуі – жасөспірім.
«Әлеуметтік желіде тараған жазба бойынша «Мемлекеттік рәміздерді қорлау» бабымен қылмыстық іс тіркеліп, сотқа дейінгі тергеу амалдары жүргізіліп жатыр. Жасөспірімдерден жауап алу ата-анасының қатысуымен жүргізілуде. Тергеу мүддесіне сәйкес өзге ақпарат жарияланбайды», – делінген полиция хабарламасында.
Айта кетейік, ел Президенті Қасым-Жомарт Тоқаев ұлттық киімдер мен ұлттық болмыс туралы пікірін айтқан болатын.
«Бет-жүзді тұмшалайтын қара киімнен гөрі өзіміздің ұлттық киімдеріміз әлдеқайда артық. Әсіресе, әйелдердің дәстүрлі киімі өте ғажап көрінеді. Себебі ұлттық киім – бұл біздің бірегей ұлттық болмысымыздың маңызды көрінісі. Оны жан-жақты дәріптеуіміз керек», – деген еді Президент Ұлттық құрылтайда.
