Теміртауда фельдшерді соққыға жығу фактісі бойынша қылмыстық іс қозғалды, деп хабарлайды kaztoday.kz.
«Теміртау қаласының 30 жастағы тұрғынына дене жарақатын келтіру фактісі бойынша 29 жастағы күдікті ұсталып, полиция бөліміне жеткізілді. Қақтығыс жұмыс орнында екі әріптестің арасында қызметтік емес жеке араздық салдарынан туындағаны анықталды. Аталған оқиға бойынша қылмыстық іс қозғалды», – деп хабарлады бейсенбі күні Қарағанды облыстық полиция департаментінің баспасөз қызметі ҚазТАГ тілшісіне.
Құқық қорғау органдары қақтығысқа қатысушылар ем қабылдап болған соң, сот-медициналық сараптамалар тағайындалатынын айтты.
«Алдын ала тергеу аясында оқиғаның мән-жайын, сондай-ақ құқық бұзушылықтың жасалуына себеп болған жағдайлар мен алғышарттарды анықтау үшін барлық қажетті тергеу әрекеттері жүргізілуде», – деп сендірді полиция департаменті.
