Мектеп бітіруші сыныптасын шампурмен өлтірді: Қанды оқиға туралы жаңа мәліметтер пайда болды, деп хабарлайды kaztoday.kz.
Мектеп түлектерінің кешінде жасөспірім қайтыс болды.
Оқиға 24 мамырға қараған түні болған. Бір түлек өз сыныптасын шампурмен өлтірген. Марқұм қызды қорғауға тырысқан сәтте жарақат алған.
Алғашқыда бұл оқиға Қаскелең қаласында болды деп хабарланған. Алайда КТК телеарнасының мәліметіне сәйкес, жасөспірімдер жалға алған коттедж Дулан ауылында орналасқан. Олар ата-анасыз, мұғалімсіз көңіл көтеріп, кейбірі спирттік ішімдік ішкен. Алайда қаза тапқан оқушы — Алибидің ішімдік ішпегені айтылды. Ол 23 мамыр күні кешкі сағат 23:00-де анасымен телефон арқылы сөйлескен.
«Қызым оған 23:00-де хабарласты. Немерем: “Мен бөлмеде жатырмын, тамағым ауырып тұр” деді», — дейді марқұмның әжесі Айдаркүл Қадырова.
Қанды оқиға болған үйді кім жалға алғаны және оның иесі кім екені әзірге белгісіз. Қырғауылды ауылындағы мектеп ұжымы бұл кештен бейхабар болғандарын айтқан.
«Соңғы қоңыраудан кейін біз балаларды ата-аналарымен үйлеріне қайтардық. Бірақ кейін білуімізше, 11-сынып оқушылары өз беттерінше жиналған. Сынып жетекшісі де, мектеп әкімшілігі де бұл кештен бейхабар болған. Бұл оқиғаға дейін ата-аналар жиналысын өткізіп, балалардың үйде болатыны жөнінде қолхат алғанбыз», — деді Қырғауылды ауылы мектебінің директоры Перизат Әбдібаева.
Қазір күдікті уақытша ұстау изоляторында отыр. Оған 15 жылға дейін бас бостандығынан айыру жазасы қаупі төніп тұр.
Айдаркүл Қадырова айтуынша, күдіктінің ата-анасы Алибидің отбасына келіп, кешірім сұраған.
