Аталған құжат Қызылорда облысының денсаулық сақтау басқармасы мен «AMANAT» партиясының облыстық филиалы арасында жасалып, денсаулық сақтау саласындағы волонтерлік қызметті дамытуға бағытталған жаңа мүмкіндіктерге жол ашады.
Бастаманың негізгі мақсаты-трғындарға денсаулық сақтау саласы бойынша түсіндіру жұмыстарын жүргізу, жастарды әлеуметтік маңызы бар қызметтерге тарту, сондай-ақ мейірбикелер, фельдшерлер мен акушерлерден құралған орта буын медициналық волонтерлер корпусын қалыптастыру.
Жоба аясында ауылдық және шалғай елді мекендерге волонтерлік қолдау көрсетіледі, алғашқы медициналық-санитарлық көмек буыны күшейтіледі, жастар үшін «әлеуметтік лифт» тетіктері қалыптастырылады, волонтерлік қызметтің ашықтығы мен есептілігі қамтамасыз етіледі.
Сонымен қатар, «Қос тәлімгерлік» моделі енгізіліп, «AMANAT» партиясы ұйымдастырушылық бағытты үйлестірсе, медициналық колледждер кәсіби оқыту алаңы ретінде қызмет атқарады.
Қол қою рәсіміне «AMANAT» партиясы облыстық филиалының төрағасы Жандос Базартай және облыстық денсаулық сақтау басқармасының басшысы Алмас Әбілпатта қатысты.
Сондай-ақ, іс-шара аясында күні кеше басталған Қызылордада медициналық білім беру мен денсаулық сақтау саласындағы өзекті мәселелерді талқылауға арналған халықаралық деңгейдегі ғылыми-тәжірибелік конференция қорытындыланып, белсенді қатысушылар арнайы алғыс хаттармен марапатталды. Кеш соңында қатысушыларға арналған концерттік бағдарлама ұйымдастырылды.
Бұл бастама-өңірдегі денсаулық сақтау саласын қолдауға, жастардың белсенділігін арттыруға және қоғам игілігі үшін бірлескен жұмысты дамытуға бағытталған маңызды қадам.
