Бүгін Қазалы ауданында Мемлекет басшысы Қасым-Жомарт Тоқаевтың бастамасымен еліміз бойынша жүзеге асырылып жатқан «Таза Қазақстан» республикалық экологиялық акциясы аясында ауқымды санитарлық тазалық және абаттандыру жұмыстары ұйымдастырылды. Акцияның басты мақсаты – елді мекендердің тазалығын қамтамасыз ету, тұрғындар арасында экологиялық мәдениетті қалыптастыру және қоғамдық орындардың көркін арттыру.
Тазалық шараларына ауданның коммуналдық қызмет мекемелерінің мамандары, кент әкімдігі, түрлі мекеме қызметкерлері мен кәсіпкерлер белсенді атсалысты. Жұмыс барысында кенттің бірқатар көшелері мен қоғамдық орындарында санитарлық тазалық жұмыстары жүргізіліп, абаттандыру бағытындағы кешенді іс-шаралар жүзеге асырылды.
Атап айтқанда, кент орталығындағы Роза Бағланова көшесі, Жалаңтөс баһадүр саябағы, Теміржол вокзалы аумағы және кәсіпкерлік нысандары орналасқан көшелер толықтай тазартылып, ретке келтірілді. Аялдамалар арнайы техникалардың көмегімен жуылып, көше бойындағы бордюрлер әктелді. Сонымен қатар жарық бағаналары мен қоршаулар сырланып, қоғамдық орындардың сыртқы келбеті жаңартылуда.
Бұдан бөлек, кәсіпкерлік нысандарының айналасын көркейтуге ерекше көңіл бөлінді. Нысандардың сыртқы келбетін қалыпқа келтіру, аумақтарды қоқыстан тазарту, арамшөптерді шабу, жасыл желектерді күтіп-баптау және санитарлық талаптарға сәйкестендіру жұмыстары жүйелі түрде атқарылды. Мұндай жұмыстар елді мекеннің эстетикалық келбетін жақсартып қана қоймай, тұрғындар үшін қолайлы әрі таза орта қалыптастыруға бағытталған.
Кент аумағында ұйымдастырылған санитарлық тазалық жұмыстарының барысын аудан әкімі Алмасбек Есмаханов арнайы аралап, атқарылып жатқан жұмыстардың сапасымен танысты. Жауапты сала басшыларымен және кент әкімдігі өкілдерімен кездескен аудан басшысы қоғамдық орындардың тазалығын тұрақты бақылауда ұстаудың маңыздылығына тоқталды.
Аудан әкімі кент әкіміне санитарлық тазалық жұмыстарын тұрақты ұйымдастыруды, абаттандыру жұмыстарын жүйелі түрде жалғастыруды, кәсіпкерлік нысандары мен тұрғын үйлердің айналасының таза әрі талапқа сай болуын қатаң бақылауда ұстауды тапсырды. Сондай-ақ, көгалдандыру, инфрақұрылым нысандарын күтіп-ұстау және тұрғындардың экологиялық мәдениетін арттыру бағытындағы жұмыстарды одан әрі күшейту қажеттігін атап өтті.
Қазалы ауданында «Таза Қазақстан» республикалық экологиялық акциясы аясындағы санитарлық тазалық және абаттандыру жұмыстары алдағы уақытта да тұрақты түрде жалғасып, ауданның барлық елді мекендерін қамтитын болады. Таза әрі көрікті қоршаған ортаны қалыптастыру – әрбір тұрғынның ортақ міндеті екені назарға алынып, бұл бағыттағы жұмыстар кезең-кезеңімен жүзеге асырыла береді.
