Шымкентте «MacCoffee 3 in 1» кофесін заңсыз өндірумен айналысқан жасырын цехтың жұмысы тоқтатылды. Контрафактілі өнім қарапайым гаражда дайындалып келген.
Әділет министрлігінің мәліметінше, өндірісте сапасы күмәнді шикізат қолданылып, кофе фирмалық қаптамаларға салынып сатылған. Жалған өнімдер қаладағы шағын сауда орындарына таратылған.
Тексеру кезінде 4 мыңнан астам кофе қаптамасы, өндірістік жабдықтар, таразылар мен қаптама материалдары тәркіленді.
Құқық иесінің айтуынша, заңсыз өнімдер сапа талаптарына сәйкес келмейді және тұтынушылардың денсаулығына қауіп төндіруі мүмкін.
Аталған факті бойынша әкімшілік іс қозғалып, материалдар сот қарауына жолданды.
