Орал қаласында білім беру саласындағы мәселелерді шешіп беремін деп тұрғындардың ақшасын иемденді деген күдікпен әйел адам тергелуде.
Оқиға қыркүйек айында белгілі болған. Полицияға шағымданған қала тұрғыны белгісіз әйелдің ақылы бөлімде оқитын ұлын мемлекеттік грантқа ауыстыруға уәде беріп, ақшасын алғанын хабарлаған. Алайда уәде орындалмаған.
Құқық қорғау органдарының тексеруі кезінде күдіктінің мұндай әрекеті бір ғана адаммен шектелмегені анықталды. Тергеу дерегінше, ол Орал қаласы мен облыс аудандарының тұрғындарына білім саласындағы түрлі мәселелерді реттеп беретінін айтып, қаражаттарын иемденген.
Қазір аталған деректер бойынша тергеу жүргізілуде.
Полиция азаматтарды оқу гранты, диплом және білімге қатысты мәселелерді ақылы түрде шешіп беремін деген күмәнді ұсыныстардан сақ болуға шақырады.
