Енді некеге тұрмас бұрын генетикалық тест тапсыру міндеттелді, деп хабарлайды kaztoday.kz.
2025 жылдың 1 қаңтарынан бастап Біріккен Араб Әмірліктерінде некеге тұру алдында генетикалық тест тапсыру барлық азаматтарға міндеттелді.
Бұл шешім елде генетикалық аурулардың кең таралуына байланысты қабылданған.
«Генетикалық тестілеу 570-тен астам генетикалық мутацияны анықтауға мүмкіндік береді. Олардың ішінде жүрек-қан тамырлары аурулары, эпилепсия, бұлшықет атрофиясы, есту қабілетін жоғалту, муковисцидоз және басқа да ауыр тұқым қуалайтын аурулар бар. Бұл әдіс отбасын жоспарлау кезінде болашақ ата-аналарға денсаулық жағдайын ескере отырып, дұрыс шешім қабылдауға көмектеседі», — делінген материалда.
БАӘ-нің Геномдық кеңесі бұл міндеттемені қараша айында өткен үкіметтік жиналыста мақұлдаған.
2022 жылы Абу-Дабиде басталған Emirati Genome Programme пилоттық жобасы аясында 800-ден астам жұп зерттеуден өткен. Нәтижесінде, 86%-ында генетикалық үйлесімділік расталды. Ал 14%-ында қосымша медициналық шаралар мен отбасы жоспарлауды қажет етті.
«Әмірліктерде жақын туыстар арасында некелесудің жоғары деңгейіне байланысты генетикалық бұзылулар кең таралған. Генетикалық тәуекелдерді түсіну медициналық қызметтердің сапасын арттырып, созылмалы аурулардан болатын ұзақмерзімді шығындарды азайтуға көмектеседі», — деп жазылған мақалада.
