2025 жылдан бастап кімдердің мобильді аударымдары қатаң бақылауда болатыны белгілі болды, деп хабарлайды kaztoday.kz.
Бұл жөнінде Мемлекеттік кірістер комитеті жауап берді.
Комитеттің ақпаратына сүйенсек, барлық Қазақстандықтардың мобильді аударымдары қатаң бақыланбайды.
Мониторинг тек үш ай ішінде ай сайын 100 және одан да көп түрлі адамдардан қаржы түскен кезде жүргізілмек. Себебі, мұндай әрекеттер кәсіпкерлік қызметке саналады.
Ал мобильді аударымдарды тек жеке мақсатта пайдаланатын жеке тұлғалар үшін шектеулер болмайды.
Егер аталмыш заң бұзушылықтар анықталған жағдайда айыппұл (15-тен 50 АЕК-ке дейін) салынып, жеке кәсіпкер (ЖК) ретінде міндетті тіркеуге дейін шаралар қабылданады. Мәселен, жылдық табысы 12 ең төменгі жалақыдан асатын жеке тұлғалар Кәсіпкерлік Кодекске сәйкес жеке кәсіпкерді тіркеуге міндетті.
«Көптеген кәсіпкер қазір салық міндеттемелерін адал орындау әлдеқайда тиімді екенін түсінді. Мобильді аударымдарға бақылау енгізілгеннен кейін көптеген адам QR-кодтарды немесе банк терминалдарын қолдана бастады», — деп хабарлады МКК.
