Елдос Сметов өзінің марапатын химия пәнінен халықаралық Олимпиада чемпионына сыйлады, деп хабарлайды kaztoday.kz.
Дзюдодан Париж Олимпиадасының чемпионы Елдос Сметов «Қызық Премия» бағдарламасының марапаттау кешінде өзіне табысталған сыйлықты химия пәнінен халықаралық Олимпиада жеңімпазына ұсынды.
«Қызық Премия» кешінде Елдос Сметов «Жыл спортшысы» атағына ие болды. Алайда спортшы өзінің марапатын пән Олимпиадасының чемпионы Санжар Бейсенәліге табыстады.
«Білім саласындағы Олимпиада чемпионы осы залда, ортамызда отыр деп естідім. Мен «Жыл спортшысы» атағын осыған дейін 3-4 рет алғанмын. Қазіргі таңда әлемде үздік атану үшін сынға түсіп жатырмын. Сіздерден қолдау күтемін. Осы марапатты өз атымнан білім саласында Олимпиада жеңімпазы болған бауырымызға сыйлағым келеді. Білім мен ғылымда үлкен жетістікке жете берсін», — деді Елдос Сметов.
2023 жылы Швейцарияның Цюрих қаласында өткен химия пәнінен халықаралық олимпиадасынан қазақстандық оқушылар олжалы оралған болатын. Дарынды оқушылар ел қанжығасына (IChO-2023) бір алтын, екі күміс және бір қола медаль әкелді.
Алтын медальді Астанадағы «Назарбаев зияткерлік мектебінің» 12-сынып оқушысы Санжар Бейсенәлі еншілеген болатын.
