Терроризмді насихаттаған 2 адам сотталды, деп хабарлайды kaztoday.kz.
Елімізде терроризмді насихаттағаны үшін 2 азамат бас бостандығынан айырылды. Бұл туралы Қазақстан ұлттық қауіпсіздік комитетінің баспасөз қызметі мәлімдеді.
Комитеттің мәліметінше, сотталғандардың біреуі — тараздық азамат «шетелде террористер жағында соғысқа қатысуға шақырып, айналасына үгіт-насихат жүргізген және өзі де солардың қатарына қосылуға ниеттенген». Ол ҚР Қылмыстық кодексінің 256-бабы, яғни, терроризмді насихаттау немесе терроризм актісін жасауға жария түрде шақыру және Қылмыстық кодекстің 174-бабы, әлеуметтік, ұлттық, рулық, нәсілдік, тектік-топтық немесе діни алауыздықты қоздыру бойынша кінәлі деп танылып, 7 жылға сотталды.
Екінші сотталған азамат Алматының тұрғыны. Ол бұған дейін де бірнеше рет сотты болған. Интернетте радикал идеологияны насихаттаған.
Соттың шешімі бойынша, ол Қылмыстық кодекстің 256-бабы, яғни, терроризмді насихаттау немесе терроризм актісін жасауға жария түрде шақыру және Қылмыстық кодекстің 296-бабы есірткі, психотроптық заттармен, сол тектестермен өткізу мақсатынсыз заңсыз жұмыс істеу бойынша кінәлі деп танылып, 7 жыл 1 айға бас бостандығынан айырылды.
