«Модельдік агенттік» деген желеумен қыздарды интимдік жұмысқа тартқан ұйымдасқан қылмыстық топ ұсталды, деп хабарлайды kaztoday.kz.
ІІМ тергеу департаменті трансұлттық ҰҚТ құру және оған қатысу фактісі бойынша көп эпизодты қылмыстық істі тергеуді аяқтады. Министрліктің мәліметінше, Астана, Алматы, Шымкент, Қарағанды, Ақтөбе қаласынан еліміздің және жақын шетел азаматтары қолға түскен. Олар модельдік агенттіктің атын жамылып, 18-25 жастағы қыздарды қылмыстық жұмысқа тартқан. Web-Cam арқылы интимдік сипаттағы материалдарды дайындаумен және таратумен айналысқан. Олардың ақша айналымы 3 миллиард теңгеден асып жығылады.
ІІМ ақпаратына сүйенсек, аталмыш қылмыстық іс бойынша 21 адам күдікті деп танылған. Олардың мүлкі тәркіленіп, 12 жылға дейінгі мерзімге бас бостандығынан айыру жазасы тағайындалуы мүмкін.
ІІМ ұйымдасқан қылмысқа қарсы күрес департаментінің өкілі Қуандық Алпыстың сөзінше, бұған ұқсас қылмыстар өткен жылы да анықталған.
– Өткен жылдың желтоқсан айында осыған ұқсас қылмыстық сызбаның жолы кесілді. Шығыс Қазақстан облысы прокуратурасының үйлестіруімен аумақтық ұйымдасқан қылмысқа қарсы күрес бөлінісінің жедел уәкілдері бір мезгілде еліміздің 11 өңірінде аталған қылмысқа қатысы бар 50-ден астам адамды құрықтап, жеткізді. Сотқа дейінгі тергеп-тексеру ҰҚТ құру және оған қатысу фактісі бойынша жүргізілуде, – деді ІІМ ұйымдасқан қылмысқа қарсы күрес департаментінің өкілі Қуандық Алпыс.
