Студент ұшақта жүрегі тоқтап құлаған адамның өміріне араша түсті, деп хабарлайды kaztoday.kz.
Оқыс оқиға Қызылорда-Астана бағытындағы ұшақта болған.
Студент Дінмұхаммед Бектұрған есінен танып, жүрегі ұстап құлап жатқан кісіге алғашқы көмегін берген. Ол Астана медицина университетінің 7 курсында оқиды.
Бортсеріктің біздің бортта дәрігерлер бар ма дегенін естіп жан-жағыма қарадым, ешкім шықпады. Өзім барып қарағанымда шамамен 50 жастағы кісіге көмек қажет болды. Жанына барған кезімде шағымдары болды: кеуде қуысының қысылуы. Нақтылайтын сұрақтар қойдым. Бортсеріктерден қан қысымын өлшейтін құралды алып тексергенімде, түсіп кеткенін көрдім. Сосын ол кісіде тахикардия болып, есінен танып қалды. Сол кезде 5 курста өткен тәжірибеме сүйеніп, ем көрсеттім. Ол кісі көзін ашты. Әуежайға жетемін дегенше бақылауда ұстадық, дейді Дінмұхаммед Бектұрған.
