Finiko қаржы пирамидасына қатысқан зейнеткер сотталды, деп хабарлайды kaztoday.kz.
Қостанай қаласының №2 соты 65 жастағы Д.Қабашеваға қатысты қылмыстық істі қарады. Ол қаржы (инвестициялық) пирамидасының құрылымдық бөлімшесін басқарғаны үшін, тартылған қаражатты кәсіпкерлік қызметке пайдаланбай, жаңа қатысушылардың жарналары арқылы бұрынғыларын байытуды ұйымдастыру мақсатында материалдық пайда табу үшін адамдардың ақшасын заңсыз тартты деп айыпталды.
ҚР ҚК 217-бабының 3-бөлігі, 2-тармағына сәйкес, бұл құқық бұзушылық үшін 5 жылдан 12 жылға дейін бас бостандығынан айыру, мүлкін тәркілеу, сондай-ақ 7 жылға дейін белгілі бір лауазымдарды атқару немесе қызмет түрімен айналысу құқығынан айыру қарастырылған.
Сот мәліметеріне сүйенсек, «2019 жылдың желтоқсанынан 2021 жылдың шілдесіне дейін айыпталушы алдын ала сөз байласқан адамдар тобымен бірге, заңсыз материалдық пайда табу үшін салымшыларды жаппай тарту қажеттігін түсініп, WhatsApp мессенджері арқылы жалған ақпарат таратып, Finiko жобасының қызметі туралы шындыққа жанаспайтын ақпараттарды халық арасында кеңінен насихаттаған және әлеуетті салымшыларды ақша салуға үгіттеген».
Салымшылар әлеуметтік желілер арқылы табылып, тартылған. Осылайша азаматтарға 42 миллион теңгеден аса материалдық зиян келтірген.
«Клиенттерден заңсыз алынған қаражат бірден транзакцияларды қадағалауды қиындату үшін «биткойн-миксер» рәсімінен өтіп, кейіннен осы заңсыз әрекеттерді ұйымдастырушылардың қолына жинақталды. Қалған бөлігі жаңа клиенттерден қаражат тарту үшін міндеттемелердің орындалып жатқанын көрсету мақсатында дивидендтер төлеуге жұмсалған. Кабашеваның алдын ала сөз байласқан адамдар тобымен бірге жасаған қылмыстық әрекеттерінің салдарынан 12 азаматқа 42 миллион теңгеден астам көлемде материалдық зиян келтірілген, бұл – аса ірі мөлшер болып табылады», – деп хабарлады Қостанай облысы сотының баспасөз қызметі.
Соттың шешімі бойынша сотталушы 7 жылға бас бостандығынан айыруға жазаланды.
«Сот жазаны тағайындау кезінде қылмыстық жауапкершілік пен жазаны жеңілдететін немесе ауырлататын мән-жайларды анықтаған жоқ. Сотталушының жеке басын, жасалған қылмыстың сипаты мен қоғамға қауіптілік дәрежесін, істің барлық мән-жайларын ескере отырып, Кабашеваға ең төменгі қауіпсіздік мекемесінде 7 жылға бас бостандығынан айыру, сондай-ақ 7 жыл бойы коммерциялық және коммерциялық емес ұйымдарда жетекшілік лауазымдарды атқару құқығынан айыру жазасын тағайындады. Зардап шеккендердің азаматтық талаптары қанағаттандырылды», – деп хабарлады облыстық соттың баспасөз қызметі.
Үкім заңды күшіне енген жоқ.
