Шымкентте 2 адам қаза тапқан ойын-сауық паркі сүрілмек, деп хабарлайды Kaztoday.kz.
Жоғарғы соттың мәліметінше, парк өткен жылдың жазында мемлекет меншігіне өткен.
«Қиял әлемі» ойын-сауық паркі шымкенттіктер арасында танымал орын. Алайда, ол тек демалыс орны ғана емес, соңғы жылдары бірқатар қайғылы оқиғалармен де есте қалды. 2021 жылы паркте екі адам қаза тапқан, ал 2023 жылы бірнеше адам аттракциондарда тұрып қалған. Бұл – бір ғана жағдай емес.
2024 жылы әкімдік сотқа жүгініп, парк иесі – «Айгерім» ЖШС 2011 жылғы келісімшартты бұзды деп мәлімдеді. Компания төрт гектар аумақта балалар орталығын салуы керек болған, бірақ оның орнына аттракциондар орнатқан. Сот билік өкілдерінің пайдасына шешім шығарып, «Айгерім» ЖШС-не жер телімін мемлекетке қайтаруды міндеттеді.
«Бұл шешім заңды күшіне енгеннен кейін әкім заңсыз тұрғызылған құрылымдарды бұзу және учаскені бастапқы қалпына келтіру туралы талап-арыз берді. Сотта ЖШС парктегі аттракциондар, әткеншектер мен басқа да құрылыстарды заңды түрде пайдалануға қабылдау актілері тіркелмегенін дәлелдейтін құжат ұсынбады», – деп түсіндірді Жоғарғы сот.
Айта кетейік, паркті бұзу туралы шешім 2023 жылдың қыркүйегінде Шымкент қаласының әкімі болып тағайындалған Ғабит Сыздықбековтің басқаруымен қабылданды.
