Құлсары қаласындағы ЖЖМ бекетінде болған жарылыстан кезекшілікте болған ерлі-зайыптылар қаза тапты, деп хабарлайды kaztoday.kz.
Кеше Атырау облысы Жылыой ауданына қарасты Күлсары қаласындағы жанармай құю бекетінде (ЖҚБ) жойқын жарылыс болып, екі адам көз жұмды.
Қаза тапқандар — ЖҚБ қызметкерлері. Бұл – сол сәтте жұмыс орнында болған ерлі-зайыптылар.
43 жастағы ер адам жарылыс болған сәтте цистернаның ішінде болған. Оның 40 жастағы жұбайы сол мезетте бекет ғимаратының ішінде болған. Екеуі де оқиға орнында көз жұмған.
Өрт 20:15-те оқшауланып, 21:47-де толық сөндірілді. Зардап шеккендердің саны 16 адамға жетті.
Оқиға орнында Төтенше жағдайлар департаменті, полиция және тергеу органдары жұмысын жалғастыруда. Қайғылы жағдайдың себептері мен мән-жайы анықталып жатыр. Қылмыстық іс қозғалды.
