Қазақстанда әлеуметтік төлемдерді заңсыз немесе алаяқтық жолмен алуға жол бермеу үшін цифрлық технологияларды пайдалану кеңейтіледі. Премьер-министр Олжас Бектенов әлеуметтік қолдау жүйесінде кездесетін мұндай заңбұзушылықтардың алдын алу қажеттігін айтып, осы бағыттағы жұмысты күшейтуді тапсырды.
Үкімет әлеуметтік саланы цифрландыру арқылы төлемдерді алушылар туралы мәліметтерді тексеру және күмәнді жағдайларды анықтау тетіктерін жетілдіріп жатыр. Жаңа технологиялар әлеуметтік көмекті нақты мұқтаж азаматтарға бағыттауға мүмкіндік беруі тиіс.
Бұған дейін Еңбек және халықты әлеуметтік қорғау министрі Асқарбек Ертаев атаулы әлеуметтік көмекті тағайындау процесіне жасанды интеллект енгізіліп жатқанын хабарлаған еді. Атап айтқанда, жүйе азаматтардың тұрғын үй-тұрмыстық жағдайын көрсететін фото және бейнематериалдарды сараптай алады.
Сонымен қатар, мүгедектік тобын белгілеу кезінде де ЖИ медициналық ақпараттарды талдауға пайдаланылады. Қолда бар мәліметке сәйкес, цифрлық жүйе атаулы әлеуметтік көмекке қатысты шамамен 99 мың өтінішті және мүгедектікті белгілеуге байланысты 151 мың өтінішті өңдеп үлгерген.
Мамандардың пайымынша, мұндай технологияларды одан әрі дамыту әлеуметтік төлемдерді тағайындау үдерісінің ашықтығын арттырып, заңсыз төлемдер мен алаяқтық әрекеттерді азайтуға ықпал етуі мүмкін.
