Қызылорда облысының Сырдария ауданында әлеуметтік желідегі тікелей эфир кезінде балағат сөздер айтқан 36 жастағы ер адам әкімшілік жауапкершілікке тартылды.
Полиция мәліметінше, құқық бұзушылық жасаған азамат TikTok платформасындағы тікелей эфир барысында бірнеше рет былапыт сөздер айтқан. Оқиға кезінде оның алкогольдік масаң күйде болғаны анықталған.
Сот шешімімен азамат ұсақ бұзақылық жасағаны үшін жауапқа тартылып, оған 60 сағат қоғамдық жұмыс жазасы тағайындалды.
Қазір Қ.О. сот белгілеген жазасын өтеуде. Ол көшелерді сыпыру, аумақтарды арамшөптерден тазарту және өзге де қоғамға пайдалы жұмыстарға тартылған.
Құқық қорғау органдары әлеуметтік желідегі әрекеттер де заң талаптарына бағынатынын ескертеді. Тікелей эфир жүргізу азаматты жауапкершіліктен босатпайды. Қоғамдық тәртіпті бұзатын әрекет нақты өмірде де, интернет кеңістігінде де заң аясында бағаланады.
Мамандардың айтуынша, әлеуметтік желілердегі жария контенттің кең аудиторияға тарайтынын ескеріп, қолданушылар өз сөздері мен әрекеттеріне жауапкершілікпен қарауы қажет.
