Астана әкімі сегіз жылға созылған LRT құрылысын аяқтау жақын деп сендіріп отыр, деп хабарлайды Kaztoday.kz.
Бұл жоба алғашында Қазақстанның Тұңғыш Президентінің амбициялық арманы ретінде басталып, кейін сыбайлас жемқорлық дауына айналды. Ақыры, бүкіл қазақстандықтардың бас ауруына айналғаны жасырын емес.
LRT жобасы бүгінде халық арасында үлкен мемге айналды. Көпшілік оны «жемқорлықтың ескерткіші» деп атап жүр.
«Кәдімгі инфрақұрылымдық жобадан ол елдің беделіне нұқсан келтіретін күрделі мәселеге айналды. LRT басынан бастап қателік болды – бұл тұтастай алғанда бір үлкен жемқорлық. Бірақ оны бұзу – уақыт пен ақшаны жоғалту деген сөз. Біз қазақстандық және шетелдік мамандарды шақырып, мәселенің шешу жолдарын қарастырамыз», – деді Қасым-Жомарт Тоқаев.
Экономист Расул Рысмамбетов LRT ешқашан өзін-өзі ақтамайтынына күмәнданбайды. Ол қоғамдық көліктің басты мақсаты пайда табу емес, халықтың ыңғайлы қозғалысын қамтамасыз ету және инфрақұрылымды дамыту екенін атап өтті.
«Қазіргі таңда әкімдік жобаның жалпы құны 1,8 миллиард доллар деп отыр. Егер бұл қаржыны қайтарғымыз келсе, бізге 103 жыл қажет болады. Ал бұл тек бастапқы шығындарды жабу мерзімі, оған қоса қызметкерлердің жалақысы, оқыту шығындары, жоспарлы және жоспардан тыс жөндеу жұмыстары бар», – дейді экономист.
