Полиция қызметкері 10 млн жымқырған істі жасырмақ болған. Бұл жөнінде Жамбыл облысының прокуратурасы мәлімдеме жасады, деп хабарлайлды Kaztoday.kz.
Прокуратураның мәліметінше, Жамбыл облысында Байзақ ауданы полиция бөлімі бастығының орынбасарына қатысты ауыр санаттағы қылмысты қасақана жасырды деген күдікпен сотқа дейінгі тергеп-тексеру жұмыстары жүргізілуде.
Қылмысты жасыру аудан аумағында орын алған 10 700 000 теңге қаражатты жымқыруға қатысты арызды сотқа дейінгі тергеп-тексерулердің бірыңғай тізіліміне тіркемеу арқылы жүзеге асырылған.
Жиналған дәлелдемелердің жиынтығымен күдіктінің іс-әрекеті ҚК-нің 433-бабы 3-бөлігінің 2-тармағымен сараланды (ауыр қылмысты адамдар тобының алдын ала сөз байласуымен жасыру). Күдікті полиция қызметкері ҚПК-нің 128-131-баптарының тәртібімен ұсталып, оған қатысты сотпен «күзетпен ұстау» түріндегі бұлтартпау шарасы санкцияланды. Сотқа дейінгі тергеп-тексеру жалғасуда. ҚПК-нің 201-бабына сәйкес өзге ақпарат жариялануға жатпайды, делінген прокуратура хабарламасында.
