Алматы қаласында Жастар саясаты басқармасының бастамасымен креативті жастарға арналған TikTok мектебі жұмысын бастайды, деп хабарлайды Kaztoday.kz Almaty.tv-ге сілтеме жасап.
Оқу бағдарламасы екі айға жоспарланған және онлайн мен офлайн форматтарын үйлестіре отырып өтеді. Сабақтарды TikTok платформасында мол тәжірибесі бар, әлем бойынша 23 миллионнан астам жазылушысы бар танымал контент авторы жүргізеді.
Мектептің негізгі мақсаты – жастарды сапалы видеоконтент жасауға, оны дұрыс таратуға және әлеуметтік желіде дамытуға үйрету. Қатысушылар трендтерді талдау, TikTok алгоритмдерін түсіну, сторителлинг негіздері, видео түсіру және монтаж жасау тәсілдерін меңгереді. Сонымен қатар, жеке бренд қалыптастыру және көрерменмен байланыс орнату тақырыптары да қамтылады.
Жастар саясаты басқармасы бұл жобаның шығармашыл жастардың әлеуетін ашуға және оларды заманауи цифрлық индустрияға тартуға ықпал ететін тиімді алаңға айналатынын атап өтті.
Мектепке алғашқылардың бірі болып тіркелген – жас видеоконтент жасаушы Ернар Сембеков. Ол TikTok-та видео түсірумен айналысқанына қарамастан, көп қаралым мен тұрақты жазылушылар жинауда қиындықтарға тап болған.
– Бұл курс мен үшін контентпен кәсіби жұмыс істеуді меңгерудің үлкен мүмкіндігі. Сарапшылардың тәжірибесіне сүйене отырып, өз идеямды тартымды әрі сәтті жобаларға айналдыруды үйренемін деп сенемін, – дейді Ернар.
