Астанада жеке клиника басшысы міндетті әлеуметтік медициналық сақтандыру қорының қаражатын заңсыз иемденгені үшін 5 жылға бас бостандығынан айырылды. Мемлекетке келтірілген шығын 79 миллион теңгеден асты.
Қаржылық мониторинг агенттігінің мәліметінше, «Forte Clinic (Tumar)» ЖШС-нің басшысы емханаға тіркелген азаматтар санын жасанды түрде көбейтіп, Медициналық сақтандыру қорынан негізсіз қаржы алып отырған. Заңсыз схеманы жүзеге асыру үшін ол Денсаулық сақтауды дамытудың ұлттық ғылыми орталығының қызметкерін тартқан.
Тергеу барысында 15 мыңнан астам азаматтың жазбаша өтініш негізінде заңсыз тіркелгені анықталды. Олардың қатарында басқа өңір тұрғындары, заңды өкілдерінің құжаттары жоқ кәмелетке толмағандар және шетелге кеткен азаматтар болған.
Сонымен қатар, клиника басшысы DamuMed ақпараттық жүйесіндегі медицина қызметкерлерінің аккаунттарын бақылауына алып, көрсетілмеген медициналық қызметтер туралы жалған мәліметтер енгізіп отырған. Осылайша, қордан заңсыз қаржы аударуға негіз қалыптастырылған.
Сот үкімімен клиника басшысы 5 жылға, ал Денсаулық сақтауды дамытудың ұлттық ғылыми орталығының қызметкері 3 жылға бас бостандығынан айырылды.
Келтірілген материалдық шығын толық көлемде мемлекетке өтелген. Сот үкімі заңды күшіне енді.
