Алматыда дипломды «жыртқан» түлек 5 тәулікке қамауға алынды

Алматы қаласында әлеуметтік желіде дипломын көпшілік алдында жыртып жатқан видеосымен танылған колледж түлегі әкімшілік жауапкершілікке тартылды.
Полиция қызметкерлері TikTok платформасына жүргізілген мониторинг барысында аталған бейнежазбаны анықтап, тексеру жұмыстарын жүргізген. Белгілі болғандай, видеода жыртылған құжат түлектің шынайы дипломы емес, алдын ала дайындалған диплом мұқабасының көшірмесі болған.
Тексеру нәтижесінде дипломның түпнұсқасы, оған берілетін қосымша құжаттары мен оқу орны табыстаған ресми мұқабасы бүлінбегені анықталды. Дегенмен жарияланған бейнеролик әлеуметтік желілерде кең таралып, қоғамда қызу талқыға түскен.
Оқиғаға байланысты полиция заңнама талаптарына сәйкес шара қолданып, бейнежазба авторын Қазақстан Республикасы Әкімшілік құқық бұзушылық туралы кодексінің 456-2-бабының 3-1-бөлігі бойынша әкімшілік жауапкершілікке тартты. Сот шешімімен оған 5 тәулік мерзімге әкімшілік қамауға алу жазасы тағайындалды.
Құқық қорғау органдары әлеуметтік желілерде жарияланатын контенттің қоғамдық тәртіп пен заң талаптарына сай болуына ерекше мән берілетінін ескертті.