Павлодар облысының Ақтоғай ауданындағы Жоламан ауылында орналасқан «Aqtogai Milk» ЖШС аумағында қайғылы оқиға орын алды. Алдын ала мәліметтерге сәйкес, кәріз құдығында болған оқиға салдарынан алты адам көз жұмып, бір адам ауруханаға жеткізілді.
Дәрігерлер 1963, 1975, 1983, 1998, 2006 және 2009 жылы туған алты азаматтың оқиға орнында қайтыс болғанын растады. Сондай-ақ, 1988 жылы туған ер адам орташа дәрежедегі көмірқышқыл газынан улану диагнозымен Ақтоғай аудандық ауруханасына жатқызылды.
Алдын ала ақпарат бойынша, қайғылы жағдай кәріз құдығындағы электр сорғысының ақауын жөндеу жұмыстары кезінде болған.
Аталған дерек бойынша қылмыстық іс қозғалды. Қазіргі уақытта оқиғаның нақты себептері мен барлық мән-жайын анықтау мақсатында тергеу амалдары жүргізіліп жатыр.
